அகந்தை

 

யாருக்கில்லை அகந்தை – இங்கு
யாருக்கில்லை அகந்தை

கற்றவன் என்றால்

வித்துவச் செருக்கு

காசைக் கண்டவன்

செல்வச் செருக்கு

பலமாய் இருந்தால்

அதிலொரு செருக்கு

புகழில் மிதந்தால்

அதிலும் செருக்கு

அழகாய் இருந்தால்

அதற்கொரு செருக்கு

கலையில் சிறந்தால்

அதுவும் செருக்கு

கண்ணகி காட்டிய

கற்பிலும் செருக்கு

நற்கவி பாரதி

நாவினிற் செருக்கு

நக்கீரர் காட்டினார்

நற்றமிழ்ச் செருக்கு

எமனேறும் பரியே

என்று பாடிய

ஔவையின் பாட்டிலும்

தொங்குது செருக்கு

வரத்தினைப் பெற்ற

சூரனின் அகந்தை

 

அதனை அழித்தது

முருகனின் அகந்தை

துட்டனாக்கியது

துரியனின் அகந்தை

அவனை அழித்தது

பீமனின் அகந்தை

சிவனை வணங்கும்

சித்தர்கள் ஆயினும்

சிந்தை எங்கும்

அகந்தை தானே

சிவனுக்கிருந்தது

அதுவும் செருக்கு

சிவனுடன் மோதிய

உமையவள் செருக்கு

எனக்கும் இருக்கும்

உனக்கும் இருக்கும்

உலகில் இங்கே

எவர்க்கும் இருக்கும்

செருக்குடன் வாழ்ந்தால்

மகிழ்வும் இருக்கும்

செருக்கைக் கண்டால்

வெறுப்பும் இருக்கும்

செருக்கில் மிதந்தால்

அழிவும் இருக்கும்

செருக்கே செருக்கால்

செருப்பாய் அழியும்

அராலியூர் அருட்செல்வம்

போதை

             போதை

மது ஒரு போதை மாது ஒரு போதை
பதவி ஒரு போதை பட்டம் ஒரு போதை

காதல் ஒரு போதை காமம் ஒரு போதை
அழகில் ஒரு போதை அறிவில் ஒரு போதை

மானம் ஒரு போதை ரோசம் ஒரு போதை
பணம் ஒரு போதை பாசம் ஒரு போதை

நேர்மை ஒரு போதை உண்மை ஒரு போதை
கர்வம் ஒரு போதை கண்ணியம் ஒரு போதை

ரசித்தால் இனிக்கும் ருசித்தால் மயக்கும்
வலிய வந்திடும் விலக மறுத்திடும்

தேடல்

                 தேடல்

காசு பணம் தேடி நாமும் ஓடுகின்றோமே - அது
கை நிறைய வந்தபோதும் ஓயவில்லையே
ஓடி ஓடிச் சேர்த்தபணம் நிலைப்பதில்லையே – அது
ஓரிடத்தில் ஒருநாளும் நிற்பதில்லையே

பணக்காரச் சொந்தம் தேடி ஒடுகிறோமே – நாமும்
பண்பான சொந்தம் தன்னை நாடவில்லையே
ஓடிவந்து உதவுவோர்க்கு மவிசுமில்லையா – இங்கு
வாழும்போது நாடுவோர்க்கு மானமில்லையா

பாடசாலை தேடி நாமும் ஓடுகின்றோமே – அங்கு
பலவிதமாய் பாடங்களும் பயிலுகின்றோமே
கற்றபடி நாமும் இங்கே வாழுகின்றோமா – இல்லைக்
கண்டபடி வாழ நாமும் தயங்குகின்றோமா

உண்மை அன்பு நேர்மை என்று புலம்புகின்றோமா – இல்லை
ஊருக்காக உத்தமர்போல் உலவுகின்றோமா
சலனமின்றிக் கொள்கையுடன் வாழுகிறோமா – இல்லை
சந்தர்ப்ப வாதிகளாய் மாறுகின்றோமா

மனிதம் தன்னைத் தேடி நாமும் ஓடுகின்றோமா – இல்லை
மந்தைக் கூட்டம் போல நாமும் வாழுகின்றோமா
உண்மை வாழ்வு என்னவென்று உணருகின்றோமா – இல்லை
ஒய்யார வாழ்வுக்காக ஓடுகின்றோமா!!!

                                    அராலியூர் அருள்